مكونات خطيرة في واقي الشمس.. ابتعدي عنها لحماية بشرتك وصحتك!

واقي الشمس بقى من الأساسيات خصوصًا في الصيف، لأنه الدرع الأول اللي بيحمي بشرتنا من أشعة الشمس الضارة زي UVA وUVB، وبيساعد كمان في تأخير ظهور علامات التقدم في السن.
لكن المفاجأة إن بعض الكريمات اللي المفروض تحمينا، ممكن تكون بتضرنا من غير ما نحس!
في دراسات وتقارير دولية حديثة حذّرت من بعض المكونات الكيميائية اللي بتدخل في تصنيع كريمات الوقاية من الشمس، واللي ممكن تتسرب للدم وتتسبب في اضطراب الهرمونات في الجسم.
إزاي ده ممكن يحصل؟
ببساطة، في مواد كيميائية قادرة تخترق خلايا الجسم وتؤثر على طريقة إنتاج الهرمونات بشكل طبيعي، وده ممكن يسبب خلل في نظام الجسم الهرموني.
بس المهم نوضح حاجة: مش كل أنواع واقي الشمس ضارة، وأطباء الجلدية بيأكدوا إن الخطر مش في استخدامه عمومًا، لكن في بعض المكونات اللي لازم نخلي بالنا منها قبل ما نشتري المنتج.
مكونات ابتعدي عنها لما تختاري واقي الشمس:
أوكسي بنزون (Oxybenzone)
أوكتينوكسات (Octinoxate)
الاتنين دول من أشهر الفلاتر اللي بتُستخدم في الكريمات علشان تمتص الأشعة فوق البنفسجية، لكن المشكلة إن تم العثور عليهم في البول، حليب الأم، الدم، وحتى السائل الأمنيوسي، وده معناه إن الجسم بيمتصهم فعليًا، وده بيرفع المخاوف من تأثيرهم على نمو الأجنة والتوازن الهرموني عند الكبار والصغار.
دراسات إضافية أشارت كمان إلى:
تأثير محتمل على الغدة الدرقية
تغيّرات في وظائف الكلى
اضطرابات في مرحلة البلوغ
تأثيرات على صحة المناعة
ورغم إن الأبحاث لسه مش كافية علشان نمنع استخدام المواد دي تمامًا، إلا إن ده بيخلينا نراجع اختياراتنا أكتر، ونفهم إيه اللي بنحطه على بشرتنا يوميًا.
إزاي تختاري واقي شمس آمن؟
دوري على كريمات مكتوب عليها “خالية من أوكسي بنزون وأوكتينوكسات”
اختاري منتجات تحتوي على مكونات معدنية طبيعية زي:
أكسيد الزنك (Zinc Oxide)
ثاني أكسيد التيتانيوم (Titanium Dioxide)
تأكدي من أن المنتج حاصل على موافقات صحية من جهات موثوقة
ولو بشرتك حساسة أو حامل، استشيري الطبيب قبل الاستخدام
في النهاية، الوقاية من الشمس مهمة جدًا، بس لازم تكون ذكية وآمنة. خلي اختياراتك دايمًا واعية، وبشرتك وصحتك أهم من أي إعلان أو عبوة جذابة.