الفنان إسلام إبراهيم يوجه رسالة إلى صديقة الفنان حمزة العيلي بعد انتهاء عرض مسلسله«شقة ٦»
وقال اسلام علي «الفيسبوك»قال في مسلسل شقة ٦بنشوف في الاول شبح مرعب بيظهر للبطلة بمجرد ظهوره بنموت من الرعب وبعد كده بنكتشف انه مؤلف موهوب مغمور وحقه مهدور بسبب انعدام الفرص والمحسوبية….. بيعاني من الفقر الشديد فبيضطر يبيع مبادئه عشان يقدر يعيش وياكل ويشرب غير انه شخص مريض نفسيا وبيعاني من الوسواس القهري وعاشق ولهان بيحب بصدق بيتورط في اعمال غير مشروعة وبيتحول لمجرم
وتابع: «كل دي تفاصيل عملها حمزة العيلي بمنتهي البراعة رغم ان جمله الحوارية كانت قليلة جدا اداءه كان كله احساس داخلي وتعبير بالعنين وبلغة الجسد مخرجش بره الشخصية للحظة مش قادر انسي مشهده وهو واقف قدام عربية الاسعاف ومقهور علي حبيبته مش قادر انسي مشهده وهو ضعيف ومكلوم بعد موت حبيبته وبيتخانق مع ممدوح الجزار اللي عارف من جواه انه اقوي منه بس مش قادر يسكت وبيشوح وايده بتترعش وبيزعق وصوته مهزوز حاجة ملهاش غير تفسير واحد ان الراجل ده جوه الشخصية جدا وناسي تماما انه حمزة هو في اللحظة دي زياد والحقيقة ان حمزة لاني اعرفه معرفة شخصية ولا دور شفتهولوا كان حمزة …مفيش شخصية عملها كانت شبهه او شبه التانية شكلا وموضوعا …ده علي مستوي الاحساس علي مستوي التكنيك والمهارات صوته وهو بيسرد الاحداث كراوي وتمكنه من اللغة العربية حاجة مشرفة وفي منتهي الرقي وده طبعا لان حمزة ممثل مسرح من الدرجة الأولى».
بدون اي تحيز وبمنتهي الشفافية حمزة فنان عالمي مش بالمعني البلدي اللي بنقولوا ع القهوة (انت عالمي ياسطي) لا بالمعني الاكاديمي للكلمة حمزة بيستخدم تكنيك عالمي ومثقف جدا في تناوله لشخصياته
واختتم كلامه «وفي سؤال محشور في زوري هو ليه حد بحجم موهبة حمزة العيلي وبسنين خبرته معندوش مسلسل بتاعه ليه الناس اللي عندهم الدرجة دي من الموهبة مش هما اللي متصدرين المسلسلات والأفلام؟»
كان حمزة العيلى، شارك مؤخرًا فى لجنة تحكيم العروض المسرحية لمهرجان “مسرح بلا إنتاج الدولي”، في دورته الحادية عشرة، التي أقيمت برئاسة الفنان إبراهيم الفرن، وحملت اسم الفنان الدكتور أشرف زكي في الفترة بين 22 إلى 26 أغسطس الحالى، تحت رعاية الدكتورة إيناس عبد الدايم وزير الثقافة، وبدعم لوجستي من الهيئة العامة لقصور الثقافة برئاسة الفنان هشام عطوة، والبيت الفني للمسرح برئاسة الفنان إسماعيل مختار، التابع لقطاع شئون الإنتاج الثقافي برئاسة الفنان خالد جلال، ومكتبة الإسكندرية التي يرأسها الدكتور مصطفى الفقي، وقطاع العلاقات الثقافية الخارجية برئاسة صبري سعيد، وهيئة تنشيط السياحة بالإسكندرية برئاسة محمد سعد.
