ألبوم “كل حياتى ”
– ياساحر : خلينى اقول ان اول اغنية فى كل البوم لعمرو هى اكتر اغنيه بستناها .. هى المؤشر لدرجة حماسى للالبوم نفسة .. عامل كده زى العريس اللى رايح يتقدم لواحدة واول حاجة اهل العروسة بيبصوا عليها هى لبسه وجزمته وطريقة كلامة .. اول اغنية بالنسبالى هى العريس بتاع الالبوم ..الاغنية تبتدى بجيتار عالمى من احمد حسين عشان يدخل وراها غزو من الالات وصوت عمرو دياب عشان يحسسوك بالهيبرة ..اللى هو يانهار اسود ..عمرو دياب حسيتة فى الاغنيه دى طفل فرحان بلعبة جديدة وعمال بيتنطط وهو بيقول بصوت الكورال .. ليلة ليلة ليلة ليلة ماحبيت ..الاغنيه فيها لاتين روك واسامه الهندى حط وراها طبلة هندى وصفارة قلبى اتمناه موجودة بس مستخبيه ورا مهرجان الالات ..الاغنية تخليك تقوم ترقص غصب عن اللى يعرفوك ..نجم الاغنية بالنسبالى اسامه الهندى
– يتعلموا : اغنية مقسوم اغنية اللايف بدون منازع والافراح والحفلات الخاصة والعامه والخالة والجدة .. تامر حسين كتب كلام يتغنى بسهولة وممكن تغنية وانت مع نفسك وتحفظة بسهولة وعمرو مصطفى عمل لحن لازم هتحفظة وتغنية ..
– كنت فى بالى : مكدبش عليكو ..الاغنية دى سمعتها مرتين بالعافية والتالتة عشان اكتب التحليل ,.نادر عبد الله كاتب كلام يخليك تقطع شرايينك وتقطع شرايين اللى جنبك .. انا بوصل لحد كلمة ( فكرة انك روحت منى مش قابلها شوف نهاية انا وانت غير دى نستاهلها ) وبقف .. ولما كملت لقيت فى الخلفية صوت بيانو مشتت يدل على حالة النكد الموجودة بغزارة ..يسكت على كده لا.. قام حاطط وراها كمان ,, قال ناقصة يعنى ..
الاغنية من الاغانى اللى متسمعهاش لو انت مفركش ..لو متجوز وطلقت .. لو حامل وسقطت ..لو مصاحب وفركشت ..لو بتحب حد وفارقك ..المفروض يكتبوا جنبها بلس خمستاشر ….الاغنية فيها من حبايب اية من البوم #معدى_الناس ..
– انت مغرور : اية دة #علم_قلبى اية اللى جابوا هنا 😀 ? دة كان الكومنت بتاعى وانا بسمعها ..ايمن بهجت قمر كتب الكلام تحس ان اى حد ممكن يكتبة ..انت مغرور انت شطور حلو انت كده ياعبد الصبور .. بس الكلام فعلا مليان قصف جبهات فوق وتحت السطور 😀 .. واحد بيهزء واحدة فى وشها كده ..نادر حمدى القادر يعمل توزيع اسمه ( ار اند بى )
ودة اللى خلاك تقول علم قلبى ..الاغنية تبتدى بكلام عادى لحد ماتيجى لحظة التهزيق ..وعند كلمة انت مغرور .. نادر حمدى يعمل 12 Beat ورا بعض كأن واحد بيدى بوكسات ورا بعضها لحد ..ايوة هما 12 انا عاددهم بالعافية 😀
– باين حبيت – مارشمللو + رؤية عمرو دياب :
عمرو دياب ادانا درسين محترمين فى فن العالمية .. طبعا كلنا اول ماسمعنا ان فية تعاون مع مارشمللو قولنا بس .. يانهار هاوس وتكنو بقى .. وكلنا قعدنا نسمع اغانية ونعملو شير لما اليوتيوب هنج مننا ..دة فكرنا المحدود ..لكن عمرو دياب كان لية فكر تانى فى العالمية .. فى مرة عمرو دياب قال على الاستيدج جملة حلوة اوى .. قال مش كل حاجة جديدة تبقي حلوة ..وفى مرة تانية قال فى برنامج الحاجة المحلية اوى بتوصل للعالمية بسرعة … طب يعمل اية ؟؟ هاتوا مارشمللو دة ..وبدل مايدخل مزيكتة مصر .. لا ..خلاه يعمل تروبيكال هاوس ومعاها اله شرقية زى الاكورديون ..مفهوم العالمية عند عمرو دياب مش انى اغنى اجنبى ولا اعمل مزيكا زى بتاعة برة ..ألعالمية عند عمرو دياب هى انى اوصل مزيكتى برة واخليهم يسمعوها ودة اللى حصل واللى مش مصدق يدخل يشوف الكومنتات المكتوبة على الاغنيه نفسها فى اليوتيوب .. ودة كان درس محترم من الهضبة ..
الدرس التانى : لما كتب رؤية عمرو دياب فى نسخة الجيتار ..طب لية كتب كده ؟ ماكان كفاية يكتب توزيع اسامة الهندى مثلا .. لا ..عمرو دياب بيدينا درس محترم فى الحاجة اللى هاتعيش سنين .. عامل زى الاب اللى بيقول لابنه انا عارف مصلحتك فين ..عارف اية اللى هايعيش وهترجع تسمعه .. ولو هو مارشمللو انا علبة جاتوة ..
انت دلوقتى لو حبيت تسمع اغنية باين حبيت هتلاقى بيجى فى بالك نسخة عمرو دياب مش مارشمللو ..وماتقولش لا عشان هتبقى بتكدب ..
– دة لو اتساب : ايمن بهجت قمر كتب الكلام المميز بتاعة .. لا دنا يجيلى تعب اعصاب ..وصوت عمرو المميز بيحلى الاغنية ..فاتحس انك عاوز ترقص لية مش عارف
– هدد : الاغانى الطربى اللى عمرو بقى بيعملها مؤخرا ليثبت ان انا والمصحف مش مغنى . انا مطرب ..حتى شوف 😀
– كل حياتى : الرومانسى اللى فكرنى بالبوم #تملى_معاك وبعترف قدام عينيك .. ونادر حمدي استخدم الالات بسيطة جدا وبدء الاغنية ببيانو الاغنية بتدخل معاها فى المود لحد مابتختم بحفلة جيتار واهات عمرو حاجة يانهار حب ..تخليك عاوز تبوس اللى قاعد جنبك
– ملاك الحسن : اية دا اية دا اية دا !!! علم قلبى تانى اهو ..نديم حميد الشاعرى اللى فكرنا بحاجات حلوة وضاف عليها حاجات جديدة بطعم 2018 .. عاوز اقول بالنسبة للكلام ان لو حد كان بعتلى الكلام دة وقالى عمرو هيغينة كنت هقعد اضحك بصراحة ..كلام ماينفعش حد مصرى يغنية لانة مليان مصطلحات صعبة فعلا ..عمرو دياب بيثبت ان لو جبتولى كلام حمو بيكا هغنية وهتحبوة برضة … وضحكة سخرية فى الاخر
التوزيع فية كمان شوية كمانجات تفكرك بعلم قلبى حبيبنا ونور عنينا ( الالبوم يعنى)
– قالك ندم : الاسطورة الجديدة صابر كمال كتب كلام عبقرى زى ( ملكش عندى غير كلمة واحدة بس اقولها ازاى دى طيب ) فكرنى بجملة ( وانت غاوى وعود فى الهوا كل سنة بقى وانت طيب ) النوع دة من الاغانى رغم انها مقسوم وانا مش بحبة بس بيعيش لسنين وسنين وشهور وقرون
– ياهناه : المعلم طارق مدكور بعد غيبة يعود بتوزيع قالب فلامنكو توزيع بسيط هادى الاغنية تبتدى بصوت الجمهور عشان يطلع الهضبة على المسرح ويقول افهم بقى ياللى فى بالى .. وبعدين مهرجان جيتارات .. حاجة كده زحمة بس حلوة ..دايما طارق مدكور بستنى يعمل حاجة فى اغانى عمرو ..مش بيعديها عادى كده … وبالفعل .. نوقف صوت عمرو عند كلمة واحن كلام يتقال .. نعلق ودن الناس شوية ..ونقطع الصوت وندخل جيتارات تانى …معلم ابن معلم
– تعالى : شكرا اسامة الهندى ..واسف لو قولت اى كلمة وصلتك وزعلت
كلمة اخيرة :
الهضبة اثبت ان موضوع الصدارة دة مش بالغنى ولا الالبومات ..الموضوع بيبتدى من التسويق .. وان هشتاج #صيف_الهضبة مكنش مكتوب هبل كده .. دة تسويق وخطة معمولة ومقصودة … نبتدى شهر 7 ننزل مايوحى بالاشكال الموسيقية للالبوم زى قميص علم قلبى وتملى معاك ومعدى الناس .. واللى مش مصدق يراجع الهاشتاجات اللى فوق هيعرف ان كلة متخطط .. وبعدين ننزل اغنية من اول شهر 7 لحد مايجى شهر 10 ننزل الالبوم كله .. وخلال ال3 شهور دول حفلات ونرمى جملة الالبوم بكرة عشان نقعد نسال فين الالبوم ومنزلش لية ..خلق حالة من حديث الناس عن الالبوم اللى منزلش ..كل دة عشان نمسك الصيف من اولة لاخرة ..ونجح الهضبة سواء عجبنا الدعاية او لا بس لازم نقولة تسلم دماغك .
شكرا للصديق العزيز Fathy Diab عشان ساعدنى اعرف الالات الموجودة فى الالبوم وساعدنى كتير
