من اللطيف اوي ان في ناس كتير مبتهتمش بالاسرات الاولي و التانيه يعني انا مثلا هسيب حتشبسوت و تحتمس و رمسيس و اقعد اقرا اسرة اولي و تانية !!ياراجل كبر مخك دول كانوا قدام اووي و تلاقيهم كانوا بدائيين جدا يعني.. !!
حقيقي انا كده بتخيل نفسي حد جالي و قالي هقولك انجازات ملك و تقوليلي هو مين .. و يقولي انجازات قد كده و ارجع اقوله. رمسيس او تحتمس فيقول لا ده الملك ( جر )
طبعا بيتنابني لحظة من الصمت و الصدمه اللي هو مين جر ده !! و يبدا وشي يحمر و احس بالخجل الشديد !!
المهم ..
تخيل كده ان ملوك الاسرة الاولي منهم ملك وصل للشلال الاول و ملك وصل للشلال التاني لا و ملك عمل معبد جنائزي جنب مقبرته ! و واحد بني هرم لا و كانوا بيروحوا المناجم في واحات مصر الشرقية و كمان في الواحات الليبيه عشان المناجم اللي هناك
لا ده كمان اول ناس استخدموا الحجر في مبانيهم .. اقول تاني و لا كفايه ..
طيب الاسرة الاولي دي بتبدي من ٣٢٠٠ ق.م لحد ٣٠٤٧ ق.م
و بدأت طبعا بالمشهور بالموحد العظيم مينا موحد القطرين طبعا نعرفه. و عارفين حكايته و عرفنا انه وحد القطرين من اثر لقينا مرسوم عليه الملك بالتاج الاببض و التاج الاحمر !! التاج الابيض كان بيمثل الجنوب و الاحمر بيمثل الشمال فمعني انه لابس الاتنين انه ملك علي الشمال و الجنوب ..
طب وليه منقولش ان اللي وحد القطرين هو ملك جيه قبله يسمي الملك العقرب !! ببساطه اوي لان معظم االي جيه قبل مينا كانوا بيلبسوا التاج الابيض بس مبيلبسوش الاحمر
بمعني انهم حاولوا يوحدوا البلاد و لكن منجحوش ف كده..
مينا ليه مقبرتين واحده فابيدوس و واحده فسقارة و كان متجوز من سيدة تدعي نيت حتب .. و حكم ٦٢ سنه سنة انت فاكرها بالساهل كده!! ٦٢ سنه ده كتيير اوي و الراجل ده تعب جداا في حكمه الراجل ده كان بيحارب جوا و برا بيحارب بدو سينا اللي بيحاولوا يثيروا الشغب و بيحارب خارج الحدود و داخل الحدود و كمان تخيل كده حضرتك لسه موحد بلد .. !! هي الناس هتسيبك!!
طبعا احنا بالنسبة لنا التوحيد دلوقتي حاحه جميله .. لكن زمانهم ده كان بالنسبه لاهل الشمال احتلال . اه احتلال !!!
فطبعا كانت بتحصل مناوشات و صراعات كتير بينهم و ثورات فبيهدي برا و بيهدي جوا ..
المهم جيه بعده الملك (عحا) اللي بيقولوا انه ابنه لكن الغريب ان الراحل ده وصل للشلال الاول و كان بيحارب ضد الليبين و ليه مقبرتين في سقارة و ف ابيدوس .. كانت البلد في اقصي مراحل التطور و التقدم الحضاري ف عصره !!!
جيه بعديه ملك اسمه (جر).. الراجل ده بقي وصل للشلال التاني انت متخيل هما لسه موحدين و عمالين يوسعوا حدود البلد ازاي و يحاولوا يحافظوا عالامن جوا و الامن برا البلد..
الملك ده حارب جماعه من الاسيويين و عمل حمله عالنوبه .. يعني انجازاته تحسها انجازات ملك من الدوله الحديثه مثلا. و ليه مقبرتين برضوا ف سقارة و ابيدوس ..
و جيه بعده ملك اسمه (واجي) برضوا كان بيرسل بعثات لمناجم الصحرا الشرقيه ..
تخش بقي علي اسطورة الاسرة الاولي و هو الملك (دن)
ده اول مرة فعصره يّستخدم لقب ملك مصر العليا و السفلي و سجل ع حجر بالرمو اسمه و اسماء الملوك اللي بعده و انجازاته و حروبه و احتفاله باعياد كتير زي عيد السد و عيد المعبودات .. و ده بقي اول واحد يستخدم الحجر في البناء !
و هذا شيء لو تعلمون عظيم ! فهو اول واحد غطي ارض مقبرته اللي فابيدوس بحجر الجرانيت .. و الجدير بالذكر ان اول برديه اتلاقت كانت من عصره لموظف عنده سّمي حماكا..
و جيه بعديه (عج ايب ).. اللي قائمه سقاره بتبدا باسمه ..
و بعدين الملك (سمرخت) .. و الملك ( قاع) ..
اهو الملك قاع ده اللي لاقينا في مقبرته بناء من اللبن يعتبر كثير من العلماء انه معبد جنائزي عشان فيه دهاليز و غرف كتيرة جدااا ..
لا ده كمان مانيتون بيقول ان رابع ملوك الاسرة الاولي بني هرم مرة واحده و في مجاعه حصلت في عصره..
هي من بعيد كده متحسهاش اسره اولي بس هي اسرة اولي..
عظيمه يا مصر..
