أول من احتفل بعيد ال “أوبت” المصري هم ملوك الأسرة الثامنة عشر و فضل المصريين يحتفلوا بالعيد ده لقرون طويلة و بعدها اتنسى و تلاشى من الذاكرة مع اندثار الديانة المصرية القديمة
احتفال المصريين القدماء بعيد الأوبت كان له مظاهر كتيرة اهمها هو موكب مقدس كان بيبدأ من معبد الكرنك متجهًا الى معبد الأقصر من خلال طريق يدعى طريق الكباش
مع مرور الوقت و الالاف السنين اندثر طريق الكباش و اتردم تحت الأرض و الناس بنوا عليه بيوت و فضل الطريق تحت الأرض الى ان بدأ بشاير اكتشافه في أربعينات القرن الماضي باكتشاف جزء صغير من الطريق و عدد ١٤ كبش و في بداية الألفينات توصل عالم المصريات المصري د محمد الصغير بعد دراسات كتير ان ده طريق كامل بيربط معبد الأقصر ب معبد الكرنك بطول 2.7 كم و الطريق ده اغلبه مردوم تحت البيوت
فضل مشروع استعادة طريق الكباش و ازالة التعديات من فوقه حلم كبير و تحدي مش سهل لانه هيحتاج هدم اكتر من ٦٠٠ مبنى الى ان عاد الحلم من تاني للنور في ٢٠١٨ و بدأت الدولة تزيل التعديات من فوق الطريق و تنقب عن الكباش تحتها و تطور من الطريق عشان يستوعب السياح و الزوار
الطريق انهاردة جاهز وشاف النور لأول مرة من قرون و بنجهز لاحتفالية مهيبة في نوفمبر القادم لافتتاح طريق الكباش و لتجديد عيد الأوبت القديم , ودي مراكب الموكب المقدس اللي هتمشي بين الكباش لاول مرة منذ الاف السنين .
البرومو الرسمي لحفل افتتاح طريق الكباش قريبا
