ببساطة هو خلق حلول اقتصاديه مغيدة للمجتمع من خلال استخدام مصادر بسيطه للإبتكار، الموضوع مش معناه اني ابتكر حاجه لكن معناه اني اخلي ابتكاري له فائده اعلي للمجتمع بتاعي.
اول البلاد اللي استخدمت طريقه التفكير دي كانت البلاد الناشئه اللي معندهاش موارد ماديه وطبيعيه كتيره فاكانوا بيعوضوا النقص ده بالموارد البشريه وقدرتها في الابتكار، زي مثلا:
– واحد اسمه Mansukh Prajapati خزاف هندي عايش في الهند، المنطقه اللي عنده بتعاني من عدم وجود كهرباء بشكل دوري فأبتكر تلاجه معموله كلها من الطين بتقدر تحفظ فيها الطعام لعدده ايام بدون ان يفسد الطعام.
– في بعض البلاد الافريقيه ممكن متقدرش تشحن موبايلك بسبب عدم وجود الكهرباء فبعض المبتكرين هناك قدروا يستخدموا العجله انها تولد طاقه كهربائيه كافيه لشحن موبايلك باستخدام الحركه.
– في بيرو البلاد بتعاني من قله مياه الامطار اللي بتنعكس علي قله الموارد المائيه للناس هناك فاستطاع طالب بكليه الهندسه انه يعمل لوحه اعلانات عملاقه تقدر تمتص رزاز الماء في الجو وتحوله لماء نظيف للسكان وقدر يولد لكل لوحه اعلانيه ٩٠ لتر من الماء يوميا.
– في الصين في بعض المناطق الفقيره تم تطوير فكره لاستخدام جهاز telemedicine لعلاج الناس من خلال ان الطبيب بيقدر يكشف علي المريض وهما الاتنين في مدن بعيده عن بعض والجهاز ده يقدر الممرضين والتقنين الاقل خبره استخدامه وإصلاحة لو حصل له مشكله، تمهيدا ان الجهاز ده يكون موجود عند نصف مليار شخص صيني في عام 2050.
– في كينيا هناك ما يقارب ٧٠٪ من سكانها بيعيشوا بدون كهرباء ومن هنا طلعت فكره منتج اسمه M-KOPA عباره عن صندوق بداخلة لوح طاقه شمسيه، ٣ لمبات LED، راديو، شاحن موبيل، المنتج ده ب ٢٠٠ دولار وده غالي لأغلب الشعب الكيني ومن هنا جائت فكره انك بتدفع ٣٥ دولار تآمين وبتستخدم المنتج وبيتم تقسيط باقي المبلغ علي اجزاء بسيطه وهو ٤٥ سنت يوميا بتقوم بدفعهم من خلال خصم الرصيد من موبايلك وبعد ٣٦٥ عمليه دفع بيتم الإنتهاء من دفع تمن المنتج وبيكون المنتج تماما بتاعتك تقدر تستخدمه مدي الحياه.
– في كنيا برضوا وجدوا ان ٨٠٪ من الكينين معندهمش حساب بنكي ومن هنا جائت فكره M-Pesa اللي بتتيح ليك استقبال وتحويل الفلوس من خلال موبايلك مش بس كده دا بق M-Pesa مصدر من مصادر العمل والدخل للناس من خلال استثمارات لهم في مجالات الطاقه زي ما اتكلمنا في المثال السابق عن M-KOPA.
الفكره ثوريه بشكل كبير واصبحت اغلب بلاد العالم بتسثتمر فيها … مثلا في امريكا في شركه اسمها gThrive الشركه دي عندها منتج بتم تركيبه في الاراضي الزراعيه علي مسافات مختلفه وبيتم توصيل (حساسات او sensors) بحيث انها تقدر تساعد المزارع وتقوله المنطقه دي من الارض محتاجه قد ايه ماء واسمده بحيث تعلي من جوده المنتجات الزراعيه له.
– في العالم في اكتر من ٣ مليار شخص ميقدروش يستخدموا الانترنت من خلال موبايلاتهم ومن هنا كانت فكره لشركه امريكيه اسمها Be-Bound بتساعد الناس اللي عندهم مشكله في الانترنت او اللي معندهمش 3G او 4G باستخدام الانترنت من خلال تكنولوجيا قديمه وبسيطه اسمها SMS.
والعديد من الأمثلة حول العالم في مجالات مختلفه ، يتم استخدام اقل موارد ممكنه لعمل وإبتكار حلول لمشاكل ، وفاعليه اكبر للحلول ، اغلب الشركات التكنولوجيا في العالم بدات تتجه للتوجه ده من التفكير كبديل لصرف مليارات الدولارات في الابحاث لإيجاد منتجات وخدمات أكثر تقعيدا وأكثر كلفه للمستخدم، فأصبحت الحلول اللي بتستخدم Frugal innovation اقل تكلفه واكثر فاعليه ومناسبه لشرائح كبيره من البشر بتعاني من الموارد والمصادر الماليه.
