لما اتسآل مدثر شيخة احد مؤسسي شركه ” كريم” عن اسباب نجاحه كانت الاجابه تتلخص في ٥ نقاط:
– حل المشاكل المحليه: جميل انك تبص حواليك في العالم وتتعلم من غيرك لكن ديما عينك لازم تكون علي الواقع بتاعك ومشاكلك ولازم تحاول انك تحول المشكله لفرصه، مثلا في كريم في الاول كان في مشكله ان المستخدمين بيعانوا من وصول السيارات بسبب ان السيارات بتوهه٫ وهنا بداوا كريم يفكروا انهم يبنوا الخرائط الخاصه بهم ولكن لقوا ان الموضوع ده مش هيجيب النتائج المتوقعه نتيجه صعوبه تعامل السائق مع نوعيه من الخرائط مش متعود عليها وعلشان كده حاولوا كريم انهم يحسنوا طرق الوصول للعميل بدون الرجوع الي خدمه العملاء او تضيع وقت كبير في كل رحلة.
– خليك سريع ومرن: مدثر بيقول ان مع بدايتهم شافوا كتاب اسمه lean startup واثر فيهم طريقه التفكير اللي بيقترحها الكاتب Eric Ries المهم حددوا ميعاد ٦ اسابيع لاطلاق الابلكيشن بتاعهم وكعاده كل شركات التكنولوجيا في الوطن العربي وصلوا للأسبوع السادس ولسه في شغل مخلصش في الابلكيشن فكانوا امام اختيارين اما اطلاق الابلكيشن بدون كل المزايا او الانتظار حتي انتهاء الكامل من تجهيز الابلكيشن فاختاروا الحل الاول، تخيلوا ان في مزايا واضافات من اول اطلاق الابلكيشن من ٤ سنين لحد دلوقتي لسه مضافتش ! لانهم ببساطه وجدوا ان السوق مش محتاج كل المزايا اللي مؤسسي كريم بيدوروا عليها بعض المزايا اضافت ولكن البعض اتركن لعدم حاجه السوق.
– عين فريق عمل موهوب: الموظف الممتاز او اللي عنده موهبه بيديك شغل اعلي ب ٢٠ مره من الموظفين العادين، وطبعا اغلب الموظفين الموهبين شغالين في شركات ضخمه او في شركات محليه معروفه وطبعا علشان تجذب انتباهم ويشتغلوا معاك الموضوع مش سهل ودا خلي مؤسسي كريم يشتغلوا بطريقتين:
* الاولي: ان كل الموظفين ايا كان شغلنتهم ايه او حجمهم في الشركه له سهم او شريك بشكل اساسي في الشركه فمن ثم طول مالشركه بتكسب الكل بيكسب .. دا الي جانب طبعا المرتب ومميزات بتخلي الناس يحبوا يشتغلوا في الشركه
* الثانيه: لما بيلقوا شركه ما شغاله بنوع معين من التكنولوجيا او الخدمات اللي تقدر تساعد كريم وفيها موظفين موهبين بيحاولوا يستحوذوا عليهم زي اللي حصل في (السعوديه٫ المغرب) بس خد بالك الموضوع مش بالساهل في شركات هما قعدوا يتفاوضوا ويقدموا عروض لهم علي مدار سنتين .. محتاج يكون عندك طوله بال
– كون سلسله حلفاء محلين: سواء كانوا مستثمرين او مستشارين او ناصحين للشركه ومتعملهمش علي انهم استشارين عاملهم علي اعتبار انهم جزء من التيم هما اكيد عندهم حجات كتيره يقدروا يقدموها سواء دعم مادي او علاقات او افكار او غيرها، المهم انك تختار الاشخاص المناسبه لك ولشركتك، بالنسبه لمدثر كلما كان في فرصه ان شركه ما تستثمر فيهم بيكون الاوليه للشركات المحليه لانهم هيساعدوهم بحجات محدش هيقدر يوفرها غيرهم.
– اعرف ليه انت بتعمل اللي بتعمله: سيبك من المقالات اللي بتقراها والكتب وكلام الاعلام انك هتبق ملياردير وان رياده الاعمال دي حاجه حلوه والكلام اللطيف ده، الشغلانه دي صعبه وصعبه جدا لانك هتتكسر كتير وهتخسر كتير لكن لو معندكش هدف بتصحي علشانه كل يوم وبسببة بتكمل الشركه هتقفل وانت هتبطل تشتغل
بالمناسبه كريم اتسمي كريم علشان الشركه بدات في اول يوم من ايام رمضان ٢٠١٢ ومن هنا جة مسمي كريم الي جانب انهم يكونوا كريم ل٣ انواع من الناس:
* عملاء: بتوفير افضل خدمه ممكنه وافضل خدمه عملاء ممكن يحصل عليها العميل.
* كابتن/ سائق السياره: اظهار الاحترام لهم ومساعدتهم واهاليهم باشكال مختلفه.
* زملائهم في الشركه: مساعدتهم بالشكل العلمي المناسب لتطويرهم على مستواهم التقني ومستقبلهم.
