واحد من آهم المستثمرين في العالم اسمه Bill Gross عمل بحث من خلال مجال عمله في الاستثمار لاكتر من ٢٠ سنه علي اهم اسباب نجاح الشركات او فشلها وكانت النتيحه:
– الوقت/التوقيت بنسبه ٤٢٪
– فريق العمل والتنفيذ ٣٢٪
– الفكره ٢٨٪
– خطه عمل الشركه ٢٤٪
– الدعم المالي والمستثمرين ١٤٪
الوقت هو من اهم اسباب النجاح وبفارق كبير عن اي عامل تاني:
– شركه زي Uber بخلاف قواتها و فكرتها الممتازه ودعم المستثمرين لها الا انها ظهرت في وقت ممتاز لان كل واحد معاه عربيه بيدور علي دخل زياده لكن ميعرفش ازاي يحققة، وده اللي Uber قدمته.
– شركه زي Airbnb المتخصصه في ايجار منازل للناس، زي Uber لكن في السكن والبيوت، كان سبب كبير لنجاحها ان اصحاب البيوت كانوا بيدوروا علي مصدر دخل لهم، وأقيم حاجه عندهم تدخل فلوس هي تآجير منازلهم لعدده ليالي لناس تيجي تستآجرها ويدفعوا فلوس.
– شركه زي Citysearch المتخصصه في توفير دليل لمعرفه والوصول لأماكن وخدمات جوه امريكا، وظهورها كان في الوقت المناسب اللي الناس بتدور فيه علي أماكن وشركات تساعدهم لتقديم خدمات مختلفه.
والوقت كان عامل مهم لفشل شركه زي Z.com المتخصصه في تقديم محتوي ترفيهي علي الانترنت .. رغم وجود فريق جيد وأس مال كبير وخطط ممتازه لنجاح الشركه سنه ١٩٩٩، ولأن وقتها مفهوم المحتوي الترفيهي علي الانترنت كان ضعيف وكان إمكانية الوصول له تحتاج لجهد يبذله المستخدم … سنه ٢٠٠٣ كانت الشركه قفلت !
بعدها بسنتين كان YouTube بيبدء في ٢٠٠٥ رغم انهم مكنش عندهم إمكانيات ورأس مال زي Z.com إلا إنها نجحت لإن الناس كانت بتدأت تستوعب معني المحتوي الترفيهي وأصبحت إمكانية الوصول أسهل.
الوقت عامل مهم جدا للنجاح … ليس العامل الوحيد لكنه عامل مؤثر جدا، فكر في الوقت قبل ماتبدء شركه او حتي تفتح شغل جديد.
